Libro de Buen Amor: 043E

Aquí dise de cómo fue fablar con doña Endrina el arçipreste V 043E Pág. 043E de 112 Libro de Buen Amor Arcipreste de Hita Esta dueña que desides, mucho es en mi poder si non por mí, non la puede omen del mundo aver, yo sé toda su fasienda, et quanto a de faser, por mi consejo lo fase más que non por su querer. Non vos diré más rasones, que asás vos e fablado, de aqueste ofiçio vivo, non e de otro coydado, muchas veses e tristesa del laserio ya pasado, porque me non es agradeçido, nin me es gualardonado. Si me diéredes ayuda de que pase algún poquillo, e esta dueña e a otras moçetas de cuello albillo, yo faré con mi escanto, que se vengan paso a pasillo, en aqueste mi farnero las traeré al sarçillo.» Yo le dixe: «Madre señora, yo vos quiero bien pagar, el mi algo et mi casa a todo vuestro mandar, de mano tomad pellote, e id, nol' dedes vagar, pero ante que vayades, quiero vos yo castigar....