Libro de Buen Amor: 043D

Aquí dise de cómo fue fablar con doña Endrina el arçipreste IV 043D Pág. 043D de 112 Libro de Buen Amor Arcipreste de Hita Desque fue en mi casa esta vieja sabida, díxele: «Madre señora, tan bien seades venida, en vuestras manos pongo mi salud e mi vida, si vos non me acorredes, mi vida es perdida. Oí desir siempre de vos mucho bien e aguisado, de quantos bienes fasedes al que a vos viene coytado como a bien e ayuda quien de vos es ayudado por la vuestra buena fama et por vos enviado. Quiero fablar convusco bien como en penitençia, toda cosa que vos diga, oídla en paciençia, si non vos, otro non sepa mi quexa e mi dolençia.» Dis' la vieja: «Pues desidlo, e aved en mí creençia. Conmigo seguramente vuestro coraçón fablad, faré por vos quanto pueda, guardar e vos lealtad. Ofiçio de corredores es de mucha poridat, más encobiertas cobrimos que mesón de vesindat. Si a quantas d'esta villa nos...